« Ne vous tenés pour escaciés
« De ceens ; mes y revenés
« Encor, et de moy retenés
« Que vous en devenrés tous riches.
« Vous estes uns jones homs riches [1]
« De bon corps et de bonne taille,
« Pour estre au duch de Cornuaille,
« Ses poinderes et ses ouvriers. »
Certes li rouges chevaliers
Estoit si mas de ces paroles
Et les retenoit pour si folles
Contre li, et non aultrement,
Qu’il vosist bien certainnement f. 150 d
Qu’il lui euist cousté grant cose
Et il n’euist ce qu’il suppose
A avoir perdu onques fait.
La damoiselle errant le met
En une cambre belle et cointe,
Seant dou manoir en le pointe,
Et li dist : « Droit ci demorés,
« Car saciés vous n’en partirés,
« Si serés dinés et servis
« De quanqu’il vous fault, ce m’est vis ;
« Car tout ensi le voelt ma dame
« Qui le m’a commandé, par m’ame. »
our cose que ceste li die,
Point ne pert sa merancolie
Agamanor li damoisiaus.
Quoi qu’il aime chiens et oisiaus,
Et qu’il soit d’armes pourveüs,
Si se tient il pour deceüs,
Et bien le sent ses coers qui art
En mautalent. Adont se part
La camberiere incontinent.
- ↑ 20417 riches, B friches.