Ce c’on li cargoit en besongne,
Et chevaucoit tous desarmés,
Et pendoit a son destre lés
L’espée, c’estoit a rebous.
Tout ensi Karentron li Rous
Se parti de Melyador,
Mais o soy enmena encor
La damoiselle qu’il avoit,
Car pas laissier ne le voloit,
C’est ses Diex, quant la en presense,
Vers la riviere de Clarense,
S’en chevauce li chevaliers.
De li lairons, il est mestiers ;
Je croi bien qu’il fist son voiage,
Car je le tieng bien a si sage f. 198 c
Que jamais ne l’euist laiiet,
Et parlerons, par vo congiet,
De Phenonée la courtoise,
En qui Amours souvent s’envoise
Pour l’amour au chevalier rouge ;
Mais mies n’en fait le harouge,
Ains le porte courtoisement.
Or couvint .i. departement
De li faire et de sa cousine,
Luciienne la tres benigne,
Qui l’avoit doucement gardée
Et compagniet plus d’une anée,
Ensi comme sage et loielle.
Car li peres la damoiselle,
Qui se nommoit contes des Isles,
N’avoit plus de filz ni de filles
Que Luciienne ne n’ot onques.
Maladie le prit adonques,
De quoi a lit il s’acouça ;
Adont sa fille remanda
Et ceste vint vers li tantos,
Page:Froissart - Méliador, tome 3.djvu/156
Le texte de cette page a été corrigé et est conforme au fac-similé.
151
Méliador
