heureux avoient tout loisir de languir dans une pareille attente. Archelaïde estoit si jalouse du soin de son honneur, et la fierté luy estoit si naturelle, qu’elle auroit mieux aymé perir mille fois, que d’en relascher le moins du monde. Elle croyoit qu’il luy seroit honteux d’abaisser ses regars sur des gens au dessous d’elle, qu’elle se seroit par ce moyen esgalez en quelque façon ; que cela les pourroit enfler de vanité, et leur feroit perdre la discretion, ce qui seroit la ruine de sa reputation et de sa vertu. C’est pourquoy elle ne voulut point prendre ce secours estranger, et elle mit à sa porte un gros Suisse vigoureux, qui empeschoit tous les gens de dehors de venir piller ce trésor de vertu et d’honneur, qu’elle luy laissa en garde. Mais par mal-heur il n’y avoit personne pour garder le Suisse, qu’elle appelloit quelquefois à son secours, dans une pressante necessité, pour chasser les ennuys secrets que luy causoit la solitude. Le petit espion domestique qu’elle avoit, et à qui rien de ce qui se fait contre l’honneur n’est caché, descouvrit un jour le secret de cette adventure. Ce fut alors que, pour luy faire honte, il se descouvrit à elle avec toutes les beautez qui donnerent assez de curiosite à Psyché pour l’eschauder. Il luy fit mille reproches sanglans du tort qu’elle se faisoit, et à tout l’empire de l’Amour, de douter de la discretion de tant d’honnestes gens qui mourroient pour elle, et de vouloir confier son honneur à la crainte servile d’un rustre. Il luy fit voir qu’elle ne meritoit pas de jouïr des joyes delicates qui se trouvent dans cette belle passion, et en un mot il luy dit que, pour se vanger d’elle, il l’alloit quitter, et publier par tout son advanture ; il jura en mesme temps par son flambeau que, puisque l’Honneur luy avoit joüé cette
