vil prix, moyennant certaine somme par an ; il luy faisoit des presens ; il luy donnoit à manger, et generalement par tous moyens il s’efforçoit de gagner son amitié. Il y avoit encore une chose dans la conversation qui les attachoit puissamment, c’est que Nicodeme estoit un grand diseur de beaux mots, de pointes, de phœbus et de galimatias, et Vollichon un grand diseur de proverbes et de quolibets ; et comme ils s’applaudissoient souvent l’un à l’autre, leur entretien estoit fort divertissant.
Nonobstant cette grande amitié qui donnoit desormais une libre entrée à Nicodeme dans la maison, elle ne luy servoit de rien pour entretenir Javotte ; car, ou elle se retiroit dans une autre chambre en le voyant venir, ou, si elle y demeuroit, elle ne luy disoit pas un mot, tant elle avoit de retenue en presence de sa mère, qui estoit tousjours auprès d’elle. Il fallut donc qu’à la fin il devint amant declaré, pour luy pouvoir parler à son aise. Ce qui le porta encore plûtost à la demander en mariage, ce fut cette consideration, que c’est toûjours un party sortable pour un advocat que la fille d’un procureur. Car Vollichon estoit riche et avoit une fort bonne estude, qu’on devoit bien plûtost appeller boutique, parcequ’on y vendoit les parties. D’autre costé Vollichon ne vouloit avoir pour gendre qu’un homme de sac et de corde. C’est ainsi qu’il appeloit en sa langue celuy que nous dirions en la nostre qui est fort attaché au Palais, et qui ne se plaist qu’à voir des papiers. Il ne se soucioit pas qu’il fût beau, poly ou galand, pourveu qu’il fût laborieux et bon ménager. Il ne comptoit mesme pour rien la rare beauté de Javotte, et il ne s’attendoit pas qu’elle luy fist faire fortune.
