Chapitre quarante-septième.
Ci devise comment le bon veneur doit chassier et prendre le dain à force.
t se le veneur vuelt chassier le dain, il le doit quérir tout einsique j’ay dit du rangier, de iiijtre ou vj chiens au plus hault, les meilleurs et les plus sages qu’il ait et se les chiens truevent où il aura viandé à matin ou de la relevée de la nuyt, il les doit lessier fere et non pas trop haster jusques tant qu’ils le fassent saillir. Et mettre pié à terre et regarder que ses chiens n’aillent la contre ongle. Et brief le chassier tout einsi que j’ai dit dou cerf ; quar un dain fuit tout einsi comme fet un cerf, fors tant qu’il fuyt plus longuement les voyes que ne fet le cerf, et plus longuement fuyt avec le change, et plus souvent ressaut aux chiens. Si le doibt chassier, rechassier, releissier et requerir le veneur comme dit est du cerf, et l’escorchier et le deffère tout en la meisme manière.
