Chapitre quatre-vingt-deuxième.
Ci devise comment on puet prendre lièvres aux paniaulz.
ussi puet on prendre les lièvres aux paniaulz au revenir au bois de leurs viandeis. On doit avoir des paniaulz qui sont fez comme roiz, le plus qu’il pourra ; et quant ce vendra deux lieues devant jour, on doit aler tendre toute la lisière du boys entre les champs et le bois, tout au long, ses paniauls ; puis doit on avoir une grant corde, la plus longue que on pourra, ou deux ou troys liées l’une à l’autre, où il ait des sonnetes ; et doit on commencer au fons de la champaigne et venir vers le boys en tirant la corde par dessus les blez. Et les lièvres quant orront les sonnettes et la noise de la corde, s’en vendront au bois et ferront aux paniaulz. Toutevoies s’il y ha un chien ou deux qui les chassent au bois et fassent férir dedans les paniauls tant vault mieulz.
