que ie naye faiz devers toy ; et ainsi pert ie les biens en gaignant maulx ; et perdue ta grace et encourrue ta yre. Ie ne me puis pas rendre innocent devers toy, car ie say bien mes deffautes qui menvironnent comme une grant ost, de lune part mes vilz euvres, dautre part mestres grans et mauvaises cogitations et ordres. Ce sont les choses par quoy iay perdus les grans biens inexplicables et qui pis est ta grace. Et quant ie recorde doulz Dieu plourant et gemant en condempnant moy meismes, ie lute a ma char et a mon couraige que de cuer ne de langue ne de euvre ie ne ne te courrouce, maiz sires la luite est si foible de ma part que tout temps me treuve a terre ; las layde parole est a dire a moy, maiz certes sires senz toy toutes mes euvres sont moins que néant. Plaise donc mon doulx Créateur et mon Seigneur que continuable meslée soit en mon couraige que nulle amistie en pechie ie ne tieigne, tousiours sires vueilles que ie cerche et examine estroitement les secrez de mon couraige, et ce que ie y trouveray de mal ie desrompe et giete hors de moy. En guise que ie me pardonne ne soye flateur a moy meismes, en tele guise doulz sires que a ton plaisir te puisse ie servir, et me fay recognoistre vrayment les tresgrans benefices que iay receuz de toy senz rien de mes mérites, et aussi sires les laiz et ordes services que ie tay rendu des biens que tu mas donnés.
Sire ie te cry mercy a grant douleur que tu qui es mon createur ay descogneu et deservy de tresgrans maulx senz nombre. Helas que ay ye fait, ha char vil et arme desraisonnable, se pour amour de mon créateur qui ma tant de biens faiz, ne me vueil laissier de mes mauvaises euvres, au moins par la paour ou des peines denfer, ou de la mort qui nul nespargne ou de la punicion en cest monde la quele ie doubte, car ie say sire que tu me pues baillier es mains de mes ennemis et estre en servitude. Aussi me pues tu faire poure et malade et trop de diverses punicions, car tu puez tout. Et donc ie faulx et traytre a mon créateur se ie vueil regarder mes tresgrans pechiez et employer a mon createur la raysonnable cognoissance quil ma donne grant, et tous les biens que on pourroit dire, et se ie vueil ce faire sire iay espérance en toy que tu osteras de sur moy le regard de vengeance. Et se ie moublie de mes pechiez, et tu de vengeance te recorderas, toutes ces choses sires ie say bien maiz rien nen fais. Si te pri doulz dieu omnipotent quil te plaise a moy adrescier a faire ton plaisir.
