Pleine sa hanste l’abat mort des arçuns :
A voiz escriet : " Tuit i murrez, glutuns.
" Ferez, paien, kar très bien les veintrum. "
Dient Franceis : " Deus ! quel doel de barun ! "Aoi.
CXXXIV
Li quens Rollanz, quant il veit Sansun mort,
Poez saveir que mult grant doel en ont.
Sun cheval brochet, si li curt ad esforz ;
Tient Durendal ki plus valt que fin or ;
Si vait férir le paien quanque il pout
Desur sun helme ki gemmez fut ad or,
Trenchet la teste e la brunie e le cors,
La bone sele ki est gemmée ad or,
E à l’ cheval parfundement le dos ;
Ambur ocit, ki que l’ blasmt ne le lot.
Dient paien : " Cist colps nus est mult forz. "
Respunt Rollanz : " Ne pois amer les voz.
" Devers vus est li orgoilz e li torz. " Aoi.
CXXXV
D’Affrike i ad un Affrican venut :
Ç’ est Malquidant, le filz à l’ rei Malcud ;
Si guarnement sunt tuit à or batut,
Cuntre le ciel sur tuz les altres luist.
Siet el’ cheval qu’il cleimet Salt-Perdut,
Beste nen est ki poisset curre à lui.
Brochet le bien des esperuns aguz :
Il vait férir Anseïs en l’escut,
Tut li trenchat le vermeill e l’azur,
De son osberc li ad les pans rumput,
El’ cors li met e le fer e le fust.
Morz est li Quens, de sun tens n’i ad plus.
Dient Franceis : « Barun, tant mare fus ! » Aoi.
