LE CHATIMENT DES SARRASINS
CCVII
Morz est Rollanz, Deus en ad l’anme es ciels...
— Li Emperere en Rencesvals parvient.
Il nen i ad ne veie, ne sentier,
Ne vuide terre, ne alne, ne plein pied,
Que il n’i ait o Franceis o paien.
Caries escriet : « U estes vus, bels niés ?
« U l’Arcevesques e li quens Oliviers ?
« U est Gerins e sis cumpainz Geriers ?
« Otes ù est, e li quens Berengiers ?
« Ives e Ivories, que j’ aveie tant chiers ?
« Qu’ est devenuz li Guascuinz Engeliers,
« Sansun li dux e Anseïs li fiers ?
« U est Gerarz de Russillun, li vielz,
« Li duze Per que j’ aveie laissiet ? »
De ço qui oalt, quant nuls nen respundiet ?
« Deus, » dist li Reis, « tant me pois esmaier
« Que jo ne fui à l’estur cumencier ! »
Tiret sa barbe cume hum ki est iriez.
Pluret des oilz e si franc chevalier ;
Encontre tere se pasment vint millier :
Naimes li dux en ad mult grant pitiét.Aoi.
CCVIII
En Rencesvals mult grant est la dulur :
Il nen i ad chevalier ne barun
Que de pitiét mult durement ne plurt :
Plurent lur filz, lur frères, lur nevulz
E lur amis e lur liges seignurs.
Encontre terré se pasment li plusur.