3145 Par la Carlun, dunt il oït parler,
Ad fait la sue Preciuse apeler.
Ço iert s’enseigne en bataille campel ;
Ses chevaliers en ad fait escrier.
Pent à sun col un soen grant escut let :
3150 D’or est la bucle e de cristal listet ;
La guige en est d’un bon palie roet.
Tient sun espiet, si l’ apelet Maltet :
La hanste fut grosse cume uns tinels,
De sul le fer fust uns mulez trussez.
3155 En sun destrier Baliganz est muntez ;
L’estreu li tint Marcules d’ultre mer.
La furcheüre ad asez grant li ber,
Graisles es flancs e larges les costez,
Gros ad le piz, belement est molez,
3160 Lées espalles e le vis ad mult cler,
Fier le visage, le chief recercelet,
Tant par ert blancs cume flur en estet.
De vasselage est suyent esprovez.
Deus ! quel vassal, s’oüst chrestientet !
3165 Le cheval brochet, li sancs en ist tuz clers,
Fait sun eslais, si tressait un fosset,
Cinquante piez i poet hum mesurer.
— Paien escrient : « Cist deit marches tenser.
« N’i ad Franceis, se à lui vient juster,
3170 « Voeillet o nun, n’i perdet sun edet.
« Carles est fols que ne s’en est alez. »Aoi.
CCLIX
Li Amiralz bien resemblet barun :
—Blanche ad la barbe ensement cume flur,
E de sa lei mult par est saives hum,
3175 E en bataille est fier e orgoillus.
Sis filz Malprimes mult est chevalerus :
Granz est e forz e trait as anceisurs.
Dist à sun père : « Sire, kar chevalchum.
« Mult me merveill se ja verrum Carlun. »
3180 Dist Baliganz : « Oïl, kar mult est pruz,
