« Mun jugement voeill sempres guarantir. »
Respundent Franc : « Or avez vus bien dit. » Aoi.
CCCVIII
Devant le Rei est venuz Pinabels ;
Granz est e forz e vassals e isnels :
3810 Qu’il fiert à colp, de sun tens n’i ad mais.
E dist à l’ Rei : « Sire, vostre est li plaiz ;
« Kar cumandez que tel noise n’i ait.
« Ci vei Tierri ki jugement ad fait ;
« Jo si li fals : od lui m’en cumbatrai. »
3843 El’ puign li met le destre guant de cerf.
Dist l’ Emperere : « Bons pleges en avrai. »
Trente parent leial plege en sunt fait.
Ço dist li Reis : « E jo l’ vus recrerrai. »
Fait cels guarder, tresqu’en serat li plaiz.Aoi.
CCCIX
3850 Quant veit Tierris qu’or en iert la bataille,
Sun destre guant en ad présentet Carle.
Li Emperere li recreit par ostage ;
Pois fait porter quatre bancs en la place ;
Là vunt sedeir cil ki s’ deivent cumbatre.
3855 Bien sunt malet par jugement des altres ;
Si l’ purparlat Ogiers de Danemarche,
E pois demandent lur chevals e lur armes.Aoi.
CCCX
Pois que il sunt à bataille jugiet,
Bien sunt cunfès e asolt e seigniet,
3830 Oent lur messes, sunt acumeniet,
Mult granz offrendes metent pur cez mus tiers.
Devant Carlun ambdui sunt repairiet,
Lur esperuns unt en lur piez calciez,
