Icele noit ne se voelt il desarmer,
Si ad vestut sun blanc osberc safret,
2500Lacet sun helme ki est ad or gemmez,
Ceinte Joiuse, unkes ne fut sa per,
Ki cascun jur muet .xxx. clartez.
Asez savum de la lance parler
Dunt Nostre Sire fut en la cruiz naffrez :
2505Carles en ad l’amure, mercit Deu !
En l’oret punt l’ad faite manuverer.
Pur ceste honur e pur ceste bontet
Li nums Joiuse l’espée fut dunez.
Barun franceis ne l’ deivent ublier :
2510Enseigne en unt de Munjoie crier ;
Pur ço ne ’s poet nule gent cuntrester. Aoi.
Clere est la noiz e la lune luisanz.
Carles se gist, mais doel ad de Rollant
E d’ Oliver li peiset mult forment,
2515Des .xii. Pers e de la franceise gent
Qu’ en Rencesvals ad laisset morz sanglenz ;
Ne poet muer n’en plurt e ne s’ desment,
E priet Deu qu’as anmes seit guarenz.
Las est li Reis, kar la peine est mult granz ;
2520Endormiz est, ne pout mais en avant.
Par tuz les prez or se dorment li Franc ;
N’i ad cheval ki puisset estre en estant :
Ki erbe voelt il la prent en gisant.
Mult ad apris ki ben conuist ahan. Aoi.
