Cil li respunt : « Qu’en fereie-jo plus ? »
Od .c. serjanz par force les cunduit ;
.Xxx. en i ad d’icels ki sunt pendut.
Ki hume traïst, sei ocit e altrui. Aoi.
3960Puis sunt turnet Baiver e Aleman
E Peitevin e Bretun e Norman.
Sur tuz les altres l’unt otriet li Franc
Que Guenes moerget par merveillus aban.
Quatre destrers funt amener avant ;
3965Puis si li lient e les piez e les mains.
Li cheval sunt orguillus e curant.
Quatre serjant les acoeillent devant
Devers une ewe ki est en mi un camp.
Guenes est turnet à perdition grant ;
3970Trestuit si nerf mult li sunt estendant,
E tuit li membre de sun cors derumpant ;
Sur l’erbe verte en espant li clers sancs.
Guenes est morz cume fels recreanz.
Ki traïst altre, nen est dreiz qu’il s’en vant. Aoi.
3975Quant li Emperere ad faite sa venjance,
Si ’n apelat les evesques de France,
Cels de Baviere et icels d’Alemaigne :
« En ma maisun ad une caitive franche,
« Tant ad oït e sermuns e essamples,
3980« Creire voelt Deu, chrestientet demandet.
« Baptizez la, pur quei Deus en ait l’anme. »
Cil li respundent : « Or seit fait par marrenes,
