enſeignoyent comme il falloit viure. D’auantage ils eſtiment tellement les petites Patenoſtres benites, qu’ils ne ceſſent de dire celles que nous auons miſes en quelques lieux publiques, & plus deuotieux, & ſi quelqu’vn en a en ſon particulier, il n’y a celuy qui ne les vueille auoir à ſon tour, & ne leur ſauroit on bailler choſe en ce monde plus à leur gré. Et parce ie vous prie de nous envoyer de ces chapelets auec ceux que vous nous enuoyerez à noſtre aide, puis que l’on en tient icy vn ſi grand conte, & aſſeurez vous que l’vn & l’autre bienfaict ſera mieux colloqué qu’au Braſil, ou à Maluco. Dieu vueille que vous puiſſiez cognoiſtre à bon eſcient, le grand beſoin qu’auons d’eſtre ſecourus, & ie le ſupplie nous vouloir donner, & à vous auſſi forces pour le ſeruir, Adieu. De Bungo le neufieme iour d’Octobre 1561.
Il y a bien pluſieurs autres belles Epiſtres, mais le temps ne m’a donné le loiſir de les traduire pour le preſent, ce ſera quand il plaira à Dieu.
