DES SEPT SAGES ’97 j’ay esté preservé de mort par la sapience de mes maistres, par les biaux exemples que vous ont raconté. La poyson et venyn qui luy fut donné pour le faire morir, ce sont les faulces paroles et accusacions que la royne m’a mis sus. Et ainsy comment Alexandre fut lepreux par la poyson qui fut convertie, ainsy j’ay esté vituperé grandement, quant on me menolt au gibet parmy la cité. Puis a la fin qu’i fut gueri entièrement, don sy grant joye se fit par tout, ainsy est il maintenant quant vous estes enformé de la verité vous cognoissés le grant bien que vous est quant je suis vif et entendant ; et que j’ay heu bonne pacience. Puis après comme l’empereur prist vengance de la royne de Egipte et de son rybaul qui vouloient faire morir Alexandre innocent, je pense que vous mectrés le cas de la royne en terme de justice tellement qu’elle sera pugnye et son rybaul selon qu’il ont amerité. En après comment le père et la mère furent repceu en honnour et gloire par leur filz, ainsy de ceste heure vous n’avés occasion de prendre seing ne pensement de rien senon de fruyr et gaudyr de vostre honnour imperiale et faire bonne chiére sans prendre melencolie de chose que vous adviengne. » Quant le filz heut achevé, l’empereur cogneut la verité de tout l’affaire et dit a son filz « 0 mon enfant, pour faire brief je te resigne mon empire et le te oultroye, car je suis amplement enformé par ces belles ystoires que ce sera pour mon mieux que je te donne la charge de tout et que je vive deshormais en repos, veu que je suis vieux et ay mieux mestier de repos que de moy mesler des charges et pensementz survenans a la seignyorie. » « Mon chier père, » dit le filz, « vous me pardonnerés, car il ne se faira pas comme vous dites, mais tant que vous vivrés vous aurés sus moy et sus chescun l’auctorité de commander et serés obey en vos commandemens. Et tant qu’i touche les labeurs et les aultres negociacions, je suis contens de les soustenir et d’y estre preux et diligent. »
