connu sous le nom de
CHRONIQUE SCANDALEUSE
1460-1483.
Et, après ladicte execucion ainsi faicte dudit connestable, fut le samedi, xiiie jour dudit moys de decembre, fait publier à Paris, à son de trompe et cry publique, le desappoinctement des generaulx maistres des monnoies pour les causes contenues oudit mandement. Et, ou lieu d’eulx, le roy mist et establist quatre personnes seulement ; c’est assavoir sires Germain de Merle et Nicolas Potier, Denis le Breton et Simon Enjorran. Et fut ordonné que les escuz d’or du roy, qui par avant avoient eu cours pour xxiiii sous parisis et trois tournois, auraient cours pour trente-cinq unzains, valans xxv sous viii deniers parisis, et que on ferait des autres escuz d’or qui auraient ung croissant ou lieu de la couronne qui estoit es autres escuz, qui vauldroient xxxvi unzains du pris de xxvi sous et vi deniers tournois, et des douzains neufz de xii tournois piece[1].
- ↑ Voy. au Registre de d’Oriole (Bibl nat., ms. fr. 10187, fol. 73 v°
