avoit tant fait cil messire Huon qu’il et messire Hue son pere estoient les plus grands barons d’Angleterre, tant de pouoir que de richesse. Et estoient toudis ou le plus maistres du Conseil du roy et vouloient maistrier et surmonter tous les haults barons d’Angleterre par envie, de quoy avindrent puis en aprez au pays et à eulx mesmes moult de maulx et de tourmens, car aprez la grand desconfiture d’Estruvelin là où le roy d’Escoce desconfist ce roy d’Angleterre et tous ses barons, comme vous avez ouy ci dessus, grand envie et murmure multiplia ou pays entre les nobles barons et le Conseil du roy, mesmement contre ledit messire Huon, et luy mettoient sus que par son conseil ilx avoient esté desconfitz, et que pour tant qu’il estoit favorable au roy d’Escoce, il avoit tant conseillié et tenu le roy en negligence en Angleterre, que les Escots avoient reconquis la bonne cité de Beruich et ars iiii journées ou v du pays par ii fois, et au derrain eulx tous desconfits ; et sur ce les dits barons eurent pluseurs fois parlement qu’ilx en pourroient faire, desquelx le cuens Thomas de Lencaste, qui estoit oncle au roy, estoit le plus grand et principal.
Sy avint que ledit messire Hue fist entendant au roy, son seigneur, que ces seigneurs avoient fait aliance contre luy et qu’ilz le mettroient hors de son pays et royaume, s’il ne se gardoit. Et tant fist par son enhortement, que le roy fist à ung jour prendre tous ces seigneurs là où ilz estoient assemblez, et en fist decoler sans delay et sans congnoissance de cause jusques à xxxii[1] des plus grands barons, desquelx le
- ↑ Froissart (éd. Luce, t. I, p. 13) donne le chiffre de vingt-deux.
