En laquelle ville y a des antiquitez que lon appelle les Araines, que les Romains feirẽt faire pour iouer leurs Comedies, en ſigne de leur victoire du temps qu’ils tenoient ce pays là.
Le Roy faiſant ſeiour en icelle ville ſe trouua fort aſſiegé des grãds eaux, auquel lieu ſeiourna vingt & vn iour, durant lequel temps print plaiſir aux dances du pays, & à faire combatre des toreaux ſauuages, que les hommes combatoient & faiſoiẽt tomber en terre ſeul à ſeul.
Le Roy partit de ce lieu le Ieudy ſeptieſme iour de Decembre, enſuyuãt apres diſner, pour aller faire ſon entree & coucher à Tarraſcon, qui eſt vne belle petite ville, & fort Chaſteau ſitué ſus vn Rocher, ſur le bord du Rhoſne, qui eſt vn gros Fleuue & fort faſcheux, qui va tumber dans la mer à huict lieuës au deſſoubz ladicte ville
