faict veoir paſſer les compagnies, entre leſquelles y auoit vne compagnie de ſept à huict cens gentilzhõmes du pays, qui eſtoient tous armez, & à cheval, en fort bon equipage. Et apres que tout fut paſſé, le Roy alla faire ſon entree en ladicte ville, qui fut fort triomphante, qui eſtoit la vigile de la Chandeleur.
Le Roy eſtant de ſeiour audict lieu, le Ieudy huictiſme iour dudict mois apres auoir faict quelque nombre de Cheualiers de ſon ordre, partit de ſon logis apres diſner, pour aller en grand magnificence, tenir ſon ſiege en ſon Palais & Court de Parlement dudict lieu, comme il auoit faict aux autres. Puis les Capitoulx d’icelle ville preſenterent vn beau feſtin au Roy en la maiſon de ladicte ville le Mardy vingtieſme iour dudict mois de Feurier.
