| 116 | L’ALCORAN. |
ordonné touchant la femelle du chameau qui à l’oreille fenduë[1], ny celle qui eſt en liberté des champs, ny touchant la brebis qui fait ſept agneaux, ny touchant le chameau dusquel ſont iſſus dix chameaux, mais les impies controuvent des blaſphemes, contre ſa divine Majeſté, & ne ſont pas ſages, lors qu’on leur a dit, venez & obſervez ce que Dieu a enſeigné à ſon Prophete, ils ont reſpondu qu’il leur ſuffit d’obſerver ce que leurs peres ont obſervé, encore que leurs, peres fuſſent ignorans & devoyez. O vous qui croyez, ayez ſoin de vous meſmes, ceux qui ſe dévoyent ne vous feront point de mal ſi vous ſuivez le droict chemin, vous ſerez tous aſſemblez devant Dieu, il vous manifeſtera toutes vos œuvres, & vous recompenſera ſelon vos merites. O vous qui croyez vous ferez voſtre teſtament lors que vous approcherez de la mort, & prendrez deux teſmoins de voſtre Religion qui ſoient gens de bien, ſi vous eſtes en voyage & que le mal vous ſurprenne, vous prendrez deux teſmoins tels qu’ils ſe rencontreront pour ſervir à voſtre teſtament, & leur direz voſtre volonté apres avoir fait voſtre priere. Si vous doutez de leur probité, vous les ferez jurer d’eſtre fidelles en leurs teſmoignages, & de ne ſe pas laiſſer corrompre par vos parens. Ne celez pas voſtre teſmoignage, autrement vous ſerez au nombre des pecheurs ; ſi vous cognoiſſez que ces deux teſmoins, ayent erré en leur teſmoignage, vous prendrez deux autres perſonnes en leur place
- ↑ Ce ſont des ceremonies des anciens Arabes que Mahomet abjure. Voy Kitab el tenoir ;
