| DE MAHOMET. | 145 |
Nous ſuivons la loy de nos peres, Dieu nous l’a ainſi commandé ; Dis leur, Dieu commande-t’il de l’offenſer ? direz-vous de Dieu ce que vous ne ſçavez pas, il vous a ordonné la juſtice, de l’adorer, & d’embraſſer ſa loy ; pluſieurs reſſuſciteront comme vous les avés veus ; une partie ſera dans le droict chemin, &: l’autre partie ſera damnée, parce qu’ils ont obey au Diable, & ont cru qu’ils eſtoient dans le droict chemin. O enfans d’Adam, veſtez vous honneſtement lors que vous irez aux Temples, mangez & beuvez de ce qui vous agréera, ne ſoyez pas prodigues, Dieu n’ayme pas ceux qui dépenſent leurs biens inutilement; Dis leur, qui a fait deffenſe de ſe veſtir proprement lors qu’on va au Temple pour adorer Dieu ? Qui a deffendu de manger des biens que Dieu vous a donnés ? cela eſt permis aux vray-croyans. Dieu expliquera ainſi ſes commandemens au jour du Jugement., Dis leur, Dieu vous deffend la paillardiſe ſecrette & publique, la deſobeïſſance, l’injuſtice, l’envie d’adorer un autre Dieu que luy, & de dire de ſa divine Majeſté ce que vous ne ſçavez pas, chacun à ſa predeſtination, & perſonne ne la peut advancer ny retarder. O enfans d’Adam, les Prophetes ne vous ont-ils pas enſeigné mes commandemens ?Ceux qui me craindront & feront de bonnes œuvres ſeront delivrez d’affliction au jour du Jugement, & ceux qui deſobeïront a mes commandemens, qui s’eſleveront contre la foy demeureront eternellement dedans le feu d’Enfer. Qui eſt
