| DE MAHOMET. | 327 |
luy avons commandé de baſtir une arche, lors que noſtre, commandement a eſté donné d’exterminer les impies, & lors que l’eau de ſon chauderon a boüilly, nous luy avons commandé d’entrer dedans l’Arche avec deux beſtes de toute ſorte de genre & eſpece, tout le peuple a eſté exterminé excepté ceux de qui nous avons cy-devant parlé (nous luy avons dit.) Ne me parle pas des infidelles, ils ſeront ſubmergez, lors que tu auras ordonné de tout ce qui doit entrer dans l’arche avec toy ; Dis, loüange ſoit à Dieu qui nous a delivré de la malice des impies, Seigneur fait nous deſcendre en un lieu benit, tu es le meilleur pilotte du monde ; C’eſtoit un ſigne de ma toute-Puiſſance pour eſprouver le peuple de Noé, nous avons apres luy creé un autre peuple, à qui nous avons envoyé un Apoſtre pour luy enſeigner d’adorer un ſeul Dieu, & a dit ; quel Dieu adorerez vous autre que Dieu ? ne craindrez-vous pas ſa colere ? les Docteurs d’entr’eux qui eſtoient des impies qui nioyent la reſurrection de la chair, & que nous avions gratifiés des biens de la terre, ont dit, il eſt homme, il boit & mange comme vous, ſi vous n’obeïſſez pas à un homme ſemblable à vous ; ſerez vous perdus ? vous promet-il de retourner au monde apres avoir eſté os & pouſſiere ? O abus, ô abus, vous eſtes abuſez en ce qu’il vous promet, il eſt homme comme les autres, il eſt un menteur, nous ne le croirons pas ; cét Apoſtre a dit, Seigneur garde moy de leurs blaſphemes, ils ſe repentiront
