| 402 | L’ALCORAN. |
viens-toy de ce que tu as dit à celuy a qui Dieu a fait la grace de le recevoir dans ſa loy, & que tu as gratifié de la liberté, que tu as dit, ne repudie pas ta femme, & crains Dieu, tu cache en ton ame un deſſein que Dieu manifeſtera, tu as peur du peuple, mais tu ne dois craindre qu’un ſeul Dieu. Lors que Zeid a repudié ſa femme[1], nous t’avons marié avec elle, afin qu’il ne reſte point d’erreur entre les vray-croyans, lors qu’ils auront repudié leurs femmes, ils obſerveront en les repudiant ce que Dieu a ordonné, Le Prophete ne peche pas de faire ce que Dieu luy a permis, la loy de Dieu a eſté ainſi obſervee par ceux qui nous ont precedé & le commandement de ſa divine Majeſté s’execute ſans retardements ; Ceux qui preſchent la parole de Dieu, ſes Apoſtres & ſes Prophetes n’ont peur de perſonne que de ſa divine Majeſté, il leur ſuffit qu’ils ſoient en ſa protection. Mahomet n’eſt pas voſtre pere[2], il eſt l’Apoſtre de Dieu & le dernier de tous les Prophetes, Dieu ſçait tout il ne viendra point d’autre Prophete apres luy. O vous qui croyez en Dieu, penſez ſouvent en ſa divine Majeſté, loüez le ſoir & matin, il vous donnera ſa miſericorde, les Anges demanderont pardon afin qu’il vous delivre des tenebres ; il eſt miſericordieux aux vray-croyans, les Anges les ſaluëront & de ſa part au jour du Jugement, il leur a preparé une tres-grande recompenſe. O Prophete, nous t’avons envoyé pour eſtre teſmoin des deportemens du peuple, & comme lumiere pour les conduire au droict chemin annonce aux vray-croyans qu’ils re-
