fauorable opinion engendree originellement en nous, ſans m’enquerir curieuſement ny comment ny pourquoy. De maniere que, ayant aymé plus que toute autre choſe feu Monſieur de La Boetie, le plus grand homme, à mon aduis, de noſtre ſiecle, ie penſerois lourdement faillir à mon deuoir, ſi à mon eſcient ie laiſſois eſuanouir & perdre vn ſi riche nom que le ſien, & vne memoire ſi digne de recommandation ; & ſi ie ne m’eſſayois, par ces parties là, de le reſuſciter & remettre en vie. Ie croy qu’il le ſent aucunement, & que ces miens offices le touchent & reſiouiſſent. De vray, il ſe loge encore chez moy ſi entier & ſi vif, que ie ne le puis croire ny ſi lourdement enterré, ny ſi entierement eſloigné de noſtre commerce. Or, Monſieur, par ce que chaque nouuelle cognoiſſance que ie donne de luy & de ſon nom, c’eſt autant de multiplication de ce ſien ſecond viure, & d’auantage que ſon nom ſ’ennoblit & ſ’honore du lieu qui le reçoit, c’eſt à moy à faire, non ſeulement de l’eſpandre le plus qu’il me fera poſſible, mais encore de le donner en garde à perſonnes d’honneur & de vertu, parmy leſquelles vous tenez tel ranc, que, pour vous donner occaſion de recueillir ce nouuel hoſte, & de luy faire bonne chere, i’ay eſté d’aduis de vous preſenter ce petit ouurage, non pour le ſeruice que vous en puiſſiez tirer, ſçachant bien que, à pratiquer Plutarque & ſes compaignons, vous n’auez que faire de truchement ; mais il eſt poſſible que Madame de Roiſſy y voyant l’ordre de ſon meſnage & de voſtre bon accord repreſenté au vif, ſera tres-aiſe de ſentir la bonté de ſon inclination naturelle auoir non ſeulement attaint, mais ſurmonté ce que les plus ſages Philoſophes ont peu imaginer du deuoir & des loix du Mariage. Et, en toute façon, ce me ſera touſiours honneur de pouuoir faire chose qui reuienne à plaiſir à vous ou aux voſtres, pour l’obligation que i’ay de vous faire ſeruice.
Monſieur, ie ſupplie Dieu qu’il vous doint tres-heureuſe & longue longue vie. De Montaigne, ce 30 avril 1570.
