En auta votz escridan : « Santa Maria, val
« E defen lo tieu poble de dolor e de mal ! »
E li Frances s’en intran pel meg loc del cortal.
Aisi coron as armas li baro Proensal
Que tuit essems s’armeron e mei lo mercadal,
Que tremblan e sospiran e an paor aital
Que motz d’els s’en fugiron enta l’aiga naval ;
Mas li milhor el savi el valent el girval,
Elh sirvent e l’arquier e tuit li menestral
S’en vengon a la porta establir lo logal
E defendol passatge e lo mur el rocal,
E apres la grant preissa del poble general.
E cant li Frances viron que lor gens no lor val,
Els an voutas las regnas cadaüs al caval :
Entrel mur e las tendas, per la riba del val,
Tuit essems esperonan dreit a l’autre portal ;
El baro de la gata e cel de l’ospital
De l’agacil salhiro e perprendol Rozal,
E brizan las barreiras, las trencadas el pal,
E vengon tuit essemble corren e sciental,
E a l’intrat de la porta an mostrat lo senhal.
Mas [e]n Ugs de Laens e n’Imbert en Rical
E n’Ugs de la Balasta en Rostains del Pugal
En W. de Menerba el baro el capdal
Defenderol passatge e l’intrat el bocal ;
En Raolf del Gua crida : « Franc cavalier leial,
« Anem a l’autra porta sofrir lo dan el mal,
« Que li Frances perprendon l’intramen el costal, »
Ladonc venon ensemble li baro natural,
— 4860. naval, corr. en aval ? — 4871. Corr. De l’agait cil ? — 4875. Ms. Mas nugos. Laens, nom corrompu ? — 4876. Ms. E nugos.