« De nos e de la vila e del poble que i es.
« Nous avem tort ni colpa valent .I. malgoires,
« Ni anc om contra vos sagrament no i empres ;
« E quius fa so entendre vos vol toldrel paes.
« El vers Dieus Jhesu Crist sab be del tot com es,
« Per quel seus cors nos valha e nostra bona fes !
— Baros, » so ditz lo coms, « trop m’etz mal e plaides,
« Car anc pois ni dabans, pos ieu vos aig comques,
« Nous plag nius abelig ma honor ni mos bes. »
E apres el apela n’Gui e n’Ug de Laces,
E n’Ala en Folcaut e n’Aldric lo Flames :
« Senher coms, » ditz n’Alas, « obs vos i aura fres
« Quel vostre mal coratge e l’ira retengues,
« Car si baissatz Tolosa pois seret[z] tant deiches
« Que jamais no seretz nulh temps el contrapes.
— Senhors, » so ditz lo coms, « eu soi tant fort esmes
« C’ai totas empenhadas mas rendas e mos ces,
« E la mia companha am mostrat e enques,
« Que fraitura e neceira los a tant sobrepres
« Que si en aiso falhia no sabria quem fes.
« E aquels que sai veno volh c’ades sian pres
« E c’om sempre los meta el castel Narbones,
« E l’avers e la plata er al nostre promes,
« Tro be siam cregut de poder e d’avers
« Per tornar en Proensa.
— 5025. etz, ms. es. — 5026. Ms. Canc anc — 5027. ni, ms. no. — 5033. La réd. en pr. ajoute : « car vos sabes be, senhor, que quand vos aurias perduda tota la terra autra, an ladita villa serian bastant de la recobrar ; et d’autra part vos veses ben com losdits habitants vos son venguts reculhir a l’andevan, que no es pas sinhal que vos velhan mal ; perque, senhor, vos los deves gardar et preservar de tot mal et dangier envers tots et contra tots » (p. 78).
