« Car ieu cuidava estre als enemics sobriers
« E conquerir Proensa e devenir paziers :
« Ara m’es obs e coita quem torne glaziers,
« Car lo coms R. es vengutz coma tempiers,
« E lo coms de Cumenge el coms R. Rogers,
« Sos filhs n’Rogers B., sos cozis en Rotgers,
« En Bernat de Cumenge e mot d’autres guerriers,
« Els baros de la vila els sirvens els roters,
« Que m’an touta la vila e mortz mos companhers,
« Per quem creis la felnia el mals e[l] desiriers.
« E no s’es meravilha sis pert mos alegriers
« Car ieu vei que las lebres an contrast als lebriers.
— Senher coms, » ditz l’avesques, « cals es est reprovers,
« Que cel que mais vos ama vos deu estre esquerriers ?
« Car a vos nos tang ira ni nulhs espaonters,
« Car en breu de termini se doblaral taulers :
« Quel cardenals mo[s] senher, qu’es lums e candeliers,
« A trames per las terras clergues e latiniers
« Que preziquen los regnes els comtatz els empers,
« E per las abadias los altres mesatgiers
« Que l’aver nos trametan, e aurem mainaders.
« E can vindral terminis que passara geniers,
« Vos veiretz tans venir crozatz e mainaders
« Per trastotas partidas, a cens e a milhiers,
« Que si era Toloza tant alta col cloquiers,
« No i remanria clausura ni murs ni traversers
« Que no sia partida o brizada a cartiers ;
« Els homes e las femnas e los efans laitiers
« Iran tuit a la espaza si no son els mostiers ;
— 6890. el, ms. els. — 6895. cel, ms. sel. — 6904. Ms. veiratz.