E las senhas del pali clarejans e batens,
Els grailes recisclans e las trompas tindens
Afortish los coratges et atemprals talens.
E lai on s’encontreron es faitz lo chaplamens ;
E de faucilhs e d’apchas e de picas razens,
De gazarmas ab flecas e de cairels punhens,
E dels escutz mirables e de coutels luzens,
Se feron es combaton tan orgulhosamens
Que detrencan e talan las caras els garnimens ;
E de pes et de cambas e de brasses a tens,
E de sanc ab cervelas es tals lo pazimens
Quels camis e las plassas son vermelhs e sagnens.
Tant es grans la batalha, l’ira el mals talens
Que d’ambas las partidas l’us e l’autre prendens
Se turtan ab las armas es prendo ab las dens.
E dedins e defora es tals l’acordamens
Que no i a cors ni membre que no sia temens.
Pero ilh de la vila sobrans e comquerens
Entre l’acer el glavi detrencans e franhens
Per trastotz los passatges les ne menan firens ;
Si trencan las batalhas els primers intramens,
C’a las portas del seti es lo defendemens.
Aitant durec la guerra el dans el perdemens
Tro venc la nog escura que partic los perdens.
Anc pos Dieus pres martiri no vic nulhs hom vivens
Batalha tant ferida de tant petitas gens.
Al partir de la coita es tals lo partimens
Que l’us torna ab ira, l’autre [ab] alegramens.
Ladoncs auziratz planher los nafratz els planhens,
— 8611. Ms. talen. — 8613. Ms. pozimens. — 8616. prendens, corr. perdens ? — 8631. planhens, corr. dolens ?