El castelas en Joris e n’Ancelmes son pres,
E li autre perderon las vidas els arnes,
En Br. de Cumenge en W. de Toges
Livrat a gran martire et en loc mortales.
E cant auzic las novas lo rics coms Cumenges
Ges no m’es a vejaire quelh sia greu nilh pes.
Apres venc a Tholoza lo valens coms joves
Per defendre la terra e per cobrar l’eres.
E lo coms n’Amaldrics s’en vai en Agenes,
Ez ac en sa cumpanha cavalers e clergues,
Els baros de la terra els crozatz els Frances ;
E fo il senher abas cui Rocamadors es,
Ab lor de Caerci e ab los Clarmontes ;
N’Amaneus de Lebret del linh Armanhagues,
Rics e galhartz e coindes, del melhs de Bazades,
E complitz de largueza, e[l] senher de Saishes ;
Ez ab motz baros d’autres e ab cels del paes,
S’es lo coms n’Amaldrics denant Marmanda asses,
Mas el s’en penedera si lo reis no i vengues.
Car la vila gardavan Centolh d’Estaragues,
Us rics valens coms joves ben arditz ez apres,
El el pros Amaneus el valens Azamfres,
N’Arnautz de Blanchafort, Vezias Lomanhes,
N’Amaneus de Boclo, en Gastos, en Sicres,
En W. Amaneus elh doi Pampalones ;
Els baros de la vila els sirvens el pobles
El donzel e l’arquier el Braiman el Ties,
Establiron la vila els fossatz els torres
D’espazas e de lansas e de bos arcs turques.
E lo coms n’Amaldrics les a tant fort comes
Que per aigua e per terra es lo glazis entes ;
— 8939. en W., corr. an.
