Com leos o laupartz, can es descadenatz :
Ben dreitament l’en porta lo seus cavals moratz,
E venc asta baichada desotz l’elm embroncatz ;
Dedins la major preicha lai on les vi mesclatz
Fer Joan de Brezi qui s’es aprimairatz,
E donec li tal colp sos espieutz nielatz
Que l’ausberc li debriza el perpung el cendatz,
Que l’abat el trabuca e es otra passatz ;
E escrida : « Tholoza ! franc cavaler, chaplatz
« Sobre la gent estranha, e firetz e trencatz ! »
E revol[v] e revira e refer vas totz latz,
Ez es per sa mainada defendutz e gardatz,
Qu’en Arnautz lor aporta la senheira en la fatz.
En Johans de Brezi es a sos pes levatz,
E fer e trenca e briza lo sieus brans aceiratz,
E venc Peyre W. de Seguret viatz,
E feric si lo comte lai on l’es aizinatz
Pla de sobre las rengas on es l’ausbercs sarratz
Que la singla li briza e l’acer es asclatz.
« Montfort ! Montfort ! » escrida, « franc cavaler, bel[s] datz ! »
Mas lo coms no si crotla ni s’es desparelhatz.
Entrels critz e la noiza els baros aturatz
Per totas las partidas es lo chaples levatz
Dels brans e de las massas e dels talhans tempratz ;
De colps e de coladas ab los escuelhs dauratz
Se feron es combaton pels peitz e pels costatz,
Que talhan e que trencan los vertz elmes vergatz
Els ausbercs e las malhas e los escutz boclatz.
E lo coms de Foish crida : « Arregnatz ! arregnatz ! »
En Folcaut de Brezi : « Franc cavalier, estatz ! »
N’Ebratz en Amaldrics en Tibautz asemblatz,
En Johans de Bolho en Jaques acostatz.
Page:La Chanson de la croisade contre les Albigeois, 1875, tome 1.djvu/380
Le texte de cette page a été corrigé et est conforme au fac-similé.
368
[1219]
croisade contre les albigeois.
