C’ab volontat saubuda et ab covens saubutz
Lo coms Centolhs e l’autri se son al rei rendutz
Dedins lo trap domini on es li or batutz.
Li prelat de la Glieiza son al rei atendutz,
E li baro de Fransa denant lui asegutz.
En .I. coichi de pali s’es lo reis sostengutz,
E pleguet son gant destre que fo ab aur cozutz,
E l’us escoutec l’autre ; e lo reis semblec mutz.
Mas l’avesques de Santas qu’es ben aperceubutz
Denant totz se razona e fo ben entendutz :
« Rics reis, arat creih joya e honors e salutz ;
« Del regeime de Franssa est ischitz e mogutz
« Per governar la Gleiza e las suas vertutz.
« E pos la santa Gleiza governas e condutz
« Aisit manda la Gleiza, e per re no o mutz,
« Que tu redas lo comte quez a tu s’es rendutz
« Al comte n’Amaldric, car li es covengutz
« Que l’arga o quel penda, e tu que l’en ajutz
« E lhivra li la vila per eretges saubutz
« Que la mortz e lo glazis lor es sobrevengutz. »
Ditz lo coms de Sent Pol qui s’en es irascutz :
« Per Dieu, senher n’avesques, non seretz pas crezutz :
« Si lo reis ret lo comte, qu’el sia cofondutz,
« Lo barnatges de Fransa n’er totz temps abatutz. »
Ditz lo coms de Bretanha : « Pos qu’el fo receubutz
« Falhira la corona sil coms es deceubutz.
— Senher, » so ditz l’avesques de Bezers, « defendutz
« S’en er lo reis de Fransa, si n’era mentaugutz,
« Si ditz que santa Gleizals ha cobratz e volgutz.
— Baros, » so ditz lo reis, « pos la Gleiza m’adutz,
— 9258. saubuda est visiblement fautif ; corr. certana ? — 9264. aur, ms. our.
