W. Br. d’Asnava car i es ichamens,
En W. Arnaudos ben e delhivramens,
Que fe genhs e brocidas els primers faizimens,
Tenon la barbacana n’Arnaut Br. formens ;
En Espas de Lomanha, que lai intrec correns
Ab sas belas companhas amics e bevolens,
Retenc la barbacana on venial turmens ;
Ez apres n’Amalvis donans e combatens,
El bos n’Ucs de la Mota firens e refirens,
Bertrans de Pestilhac fort be ardidamens
Tenon la barbacana Pozamila, suffrens
Los trebalhs e las guerras e los perilhamens.
Pelfortz, qu’es pros e savis e adreitz e plazens,
En Raters de Caussada mals e bos e punhens,
El en Rainiers de Bosna, Johans Martis fazens,
Tenon la barbacana Matabou finamens.
E la porta Galharda on eral chaplamens,
Don ichien tot dia cavaliers e sirvens,
Li baron de Tholoza aperceubudamens,
Que comensan las guerras els trebalhs els contens,
Per quels camps e las plassas en remano sagnens,
Tenon, cels de la vila, els anans els vinens,
Per gardar e defendre los intrans els ichens.
E mos senhel coms joves on es valors valens,
Que restaura Paratge e los orgulhos vens,
E colora e daura los perdutz els perdens,
En Bertrans de Tholoza, en Ucs d’Alfar garnens,
Son de la barbacana Vilanova establens ;
En Ar. de Cumenge qu’es bels e bos e gens
— 9481. brocidas, corr. garidas ? cf. 9539. — 9493. Rainers, ms. Ratiers ; cf. le texte de la réd. en pr. — 9507. Ar., ms. Br. ; cf. la réd. en pr. et 9509.
