Qu’on peut rendre en personne, ou bien par parasites ;
Qu’aux environs d’icy nul ne fasse un seul tour
Dont mon livre chargé ne l’instruise au retour ;
Et que, si je surprens le Soldat aupres d’elle,
Je tienne des clains-d’œil un registre fidelle,
Escrive leur propos de l’un à l’autre bout,
Ne laisse rien passer, et sois present à tout :
(Car le sage ne doit qu’à soy-mesme s’attendre[1]).
C’eust esté pour quelque autre un plaisir de l’entendre ;
Moy, qui sans cesse marche, et qui trotte, et qui cours,
Je ne ris qu’à demy de semblables discours,
Et je souhaiterois, du fond[2] de ma pensée,
Que le Dieu Cupidon eust la teste cassée :
Cela feroit grand bien aux pieds de cent valets.
J’approche de Thaïs, et voici son palais.
Quoy ! j’apperçois aussi nostre flateur à gage !
Scène 3
Parmenon
Avance, homme de bien !
Gnaton
Contemple ce visage.
Parmenon
Le coquin parle en Prince, et n’est qu’un gueux parfait.
Gnaton
Tu te penses moquer, je suis Prince en effet.
Parmenon
Des fous, cela s’entend.