Cherée
Tout de mesme.
Parmenon
Vous ne sçavez donc rien ?
Cherée
Rien, sinon que je l’ayme.
Parmenon
Me voila bien instruit, quel chemin ont-ils pris ?
Cherée
Tandis qu’elle arrestoit mes sens et mes esprits,
Nostre hoste Archidemide, avec son front severe,
Est venu m’aborder, et m’a dit que mon pere
Ne faillist pas demain d’estre son défenseur
Contre l’injuste effort d’un puissant agresseur ;
Et, comme les vieillards sont longs en toute chose,
D’un recit ennuieux il m’a déduit sa cause,
Tant, qu’apres nostre adieu je n’ay plus apperceu
L’objet de ce desir qu’en passant j’ay conceu.
Parmenon
C’est estre malheureux.
Cherée
Autant qu’homme du monde.
Parmenon
Vous l’avez bien maudit ?
Cherée
Depuis plus de deux ans nous ne nous estions veus.
Parmenon
Il se rencontre ainsi des malheureux impreveus.
Celuy qui la menoit est quelque homme de mine ?
Cherée
Rien de moins. Tu le croyrois un pilier de cuisine,
Et luy seul, sans mentir, est aussi gras que deux.