Page:La Vie de saint Alexis.djvu/17

LXXIX.	A halte voiz prist li pedre a crider :
	« Filz Alexis, quels duels m’est presentez !
	Malvaise guarde t’ai fait soz mon degret.
	A ! las pechables, com par fui avoglez !
	Tant l’ai vedut, si nel poi aviser !
LXXX.	« Filz Alexis, de ta dolente medre !
	Tantes dolors at por tei enduredes,
	E tantes fains e tantes seiz passedes,
	E tantes lairmes por le tuen cors ploredes !
	Cist duels l’avrat encui par acorede.
LXXXI.	« O filz, cui ierent mes granz ereditez,
	Mes larges terres dont jo aveie assez,
	Mi grant palais en Rome la citet ?
	Empor tei, filz, m’en estei penez :
	Puis mon deces en fusses onorez.
LXXXII.	« Blanc ai le chief e la barbe ai chanude :
	Ma grant onor aveie retenude
	Empor tei, filz, mais n’en aveies cure.
	Si grant dolor ui m’est apareude !
	Filz, la toe aneme seit el ciel assolude !
LXXXIII.	« Tei covenist helme e bronie a porter,
	Espede ceindre come toi altre per ;
	Ta grant maisniede dousses governer,
	Le gonfanon l’emperedor porter,
	Com fist tes pedre e li tuens parentez.