Page:La Vie de saint Alexis.djvu/24

CXIV.	Sainz Boneface, qued om martir apelet,
	Aveit en Rome une eglise molt bele :
	Iluec en portent saint Alexis a certes
	Et atement le posent a la terre.
	Felix li lieus ou ses sainz cors herberget !
CXV.	La gent de Rome, qui taut l’ont desidret,
	Set jorz le tienent sour terre a podestet.
	Grant est la presse, ne l’estuet demander :
	De totes parz l’ont si avironet
	Que avisonques i puet om abiter.
CXVI.	Al setme jorn fut faite la herberge
	A cel saint cors, a la geme celeste ;
	En sus se traient, si alaschet la presse :
	Vueillent o non, sil laissent metre en terre ;
	Ço peiset els, mais altre ne puet estre.
CXVII.	Ad encensiers, ad ories chandelabres
	Clerc revestut en albes et en chapes
	Metent le cors enz el sarcueu de marbre.
	Alquant i chantent, li pluisor getent lairmes :
	Ja le lor vueil de lui ne desevrassent.
CXVIII.	D’or e de gemes fut li sarcueus parez
	Por cel saint cors qu’il i deivent poser ;
	En terrel metent par vive podestet.
	Plorent li pueples de Rome la citet :
	Soz ciel n’at ome quis puisset conforter.