Page:La Vie de saint Alexis.djvu/8

XXXIV.	Quant tot son cuer en at si atornet
	Que ja son vuel n’eistrat de la citet,
	Deus fist l’imagene por soe amor parler
	Al servitor qui serveit a l’alter ;
	Ço li comandet : « Apele l’ome Deu. »
XXXV.	Ço dist l’imagene : « Fai l’ome Deu venir
	Enz el mostier, quer il l’at deservit,
	Et il est dignes d’entrer en paradis. »
	Cil vait, sil quiert, mais il nel set choisir,
	Icel siant ome de cui l’imagene dist.
XXXVI.	Revint li costre a l’imagene el mostier :
	« Certes », dist il, « ne sai cui entercier. »
	Respont l’imagene : « Ço’st cil qui tres l’uis siet.
	Pres est de Deu e del regne del ciel :
	Par nule guise ne s’en vuelt esloignier. »
XXXVII.	Cil vait, sil quiert, fait l’el mostier venir.
	Es vos l’essemple par trestot le pais
	Que cele imagene parlat por Alexis :
	Trestoit l’onorent, li grant e li petit,
	E toit li prient que d’els aiet mercit.
XXXVIII.	Quant il ço veit quel vuelent onorer :
	« Certes », dist il, « n’i ai mais ad ester ;
	D’iceste onor nem revueil encombrer. »
	En mie nuit s’en fuit de la citet :
	Dreit a Lalice rejoint li suens edrers.