nus hom en si brief tans ne fist tel conquestée,
ne Julius Cesar, ne Crasus, ne Pompée.
après lui fu la tierre à martire livrée
par l’orguel des barons, et desierte et gâtée ;
perte de bon signor n’est pas tos recouvrée ;
de toutes bones gens devroit estre plorée ;
ains par,[1] tiere ne fu à si bon commandée.
Li rois qui Macidone tenoit en sa baillie,
et Grese et le pais,[2] et toute Esclavonie,
cil fu pere à l’enfant de cui oes la vie ;[3]
Phelippes ot à non, rois de grant signorie.
une dame prist bele, et gente et escavie ;
Olimpias ot non, fille au roi d’Ermenie
qui rices est d’avoir, d’or et de manandie,
de tieres et d’ounor, et de gent bien hardie.
et la dame fu preus et de grant signorie ;
si ama biaus deduis de bos, de cacerie,
harpe, rote et viele, et gige et cyfanie,[4]
et autres estrumens et douce mélodie.
cil est privés de li, ne l’ mescrées vus mie,
qui par armes conquist pris de cevalerie ;
et lor donnoit grans dons, car de biens est garnie,
les biaus cevaus d’arabes, et les mus[5] de Surie,
les siglatons d’Espagne, les pales d’Aumarie ;
puis, li fu sa bontes a grant mal avertie,
quar la mauvese gent qui plaine est de boisdie,
l’orent en traison, de maudire aquellie ;
disent qu’ele faisoit de son cors legerie,
ne gardoit preu la foi que le roi ot plevie,
quar à piour de lui se connissoit amie,
et de cors et d’avoir li otrioit partie.
autresi font encor li garçon plain d’envie ;
n’est dame, se tant fait, que ele jut ne rie,
ne moustre bel semblant, que ne soit envaie.
qui mal lor quert à tort, li cors Deu[6] les maudie.
la roine le sot, qui mult en fu irie ;
Page:Lambert li Tors - Li romans d’Alixandre, 1846.djvu/31
Cette page a été validée par deux contributeurs.
4
ENFANCE D’ALIXANDRE.
![](http://upload.wikimedia.org/wikipedia/commons/thumb/6/6e/Lambert_li_Tors_-_Li_romans_d%E2%80%99Alixandre%2C_1846.djvu/page31-1024px-Lambert_li_Tors_-_Li_romans_d%E2%80%99Alixandre%2C_1846.djvu.jpg)