« et mult vilainement l’esteura repairier,
« si com fist li serpens qui retorna arier. »
cis a fait[1] Felipon durement esmaier.
Après ces ii. parla Aristote d’Ataine ;
en pies en est levés, de bien dire se paine :
« oies, fait-il, signor, une raison certaine.
« li oes de coi parlons, n’est mie cose vaine ;
« le monde senefie et la mer et l’araine,
« et li mijous dedens est tiere de gent plaine ;
« de l’ serpent qu’en iscoit, vou l’di par Ste. Elaine,
« que cou est Alixandres qui souferra grant paine,
« et ert sires de l’ monde, ma parole en ert saine ;
« et si homme, après lui, le tenront en demaine,
« puis retournera mors en Grese Macédaine. »
Felipes ot grant joie de l’ songe ki bien pent,
mult ama Aristote, et le tint cièrement ;
tout li abandonna son or et son argent.
Alixandres fu preus et de bon entient ;
ce conte l’escriture, se l’estore ne ment,
que plus sot en x jors que i. autres en c. ;
la nouviele en ala de si en Orient.[2]
de ne sai quans pais i sont venu la gent,
li mestre des escoles, li bon clerc sapient
qui voloient connoistre sen cuer et sen talent.
Aristotes d’Ataines l’aprit onestement,
il li moustre escriture, et li valles l’entent,
Griu, Ebriu et Caldiu et Latin ensement,
et toute la nature de la mer et de l’ vent,
et le cours des estoiles, et le compasement
isi com li planette maine le[3] firmament ;
et le vie de l’ mont et quant k’il i apent,
et connoistre raison, et savoir ingrement,[4]
si commes retorikes en fait devisement ;
après cou li a dit i. bon castiement :
que ja sers de putaire n’est[5] entor lui sovent ;
quar maint home en sunt mort, et livré à torment,F. 5b
Page:Lambert li Tors - Li romans d’Alixandre, 1846.djvu/35
Le texte de cette page a été corrigé et est conforme au fac-similé.
8
ENFANCE D’ALIXANDRE.
