Qant voit que ne li velt mot dire :
Ha ! fet-il, biau très doz sire,
Respondez moi se vos volez,
Ne soiez pas si adolez
Por rien que je vos aie fet ;
Mès se je vos ai rien forfet,
Je sui tot prest deI amender
Si con le vodrez demander,
Jà n’en iré encontre vos.
Par Dieu, ce dist Renart li rous,
Primaut, que ne me gabez mie,
Se vos avez par glotonnie
Tot par vos mengié vostre oison,
Ne m’en dites pas desraison,
Car ce ne seroit pas savoir,
N’en croistriez pas vostre avoir,
Ne vostre avoir ne vostre pris :
Se vos avez vers moi mespris,
Bien sai que vos l’amenderez
Toutes les eures que vodrez,
Et il en sera tans et Leus.
Sire, ce dist Primaut li leus,
Se Diex me gart, je m’en recort
Que fet vos ai anui et tort,
Bien en doi estre ledengiez ;
Mès bien avez esté vengiez,
Car si con mengier le voloie,
Moflart qui aloit querant proie,
Page:Le Roman du Renart, 1826, tome 1.djvu/181
Apparence
Le texte de cette page a été corrigé et est conforme au fac-similé.