Li dist, sire, vos dites mal,
Que par le Pere esperital
Li cos est trop dur à mengier,
Se vos le volez eschangier,
Il a bien deus ans trestoz plains ;
Mès je vos donré de mes mains
Trois poucins tendres, se voulez,
Dont vos serez bien saoulez,
Et vos feront à vostre cuer
Greignor bien, foi que doi ma suer
Dame Litouis de la Monjoie :
Qar li cos a, se Diex me voie,
Et les ners et la char trop dure.
Vilain, fait Renart, je n’ai cure
De tes poucins, tuit soient ton,
Mès se tu veus fere mon bon
J’auré le coc que je demant.
Sire, fet-il, vostre conmant
Ferai par droit et par raison,
Que je sui vostre liges hom :
Par mon chief orendroit l’auroiz
Puis que vos tant le desirrez.
Atant let li vilains le plet,
Et maintenant au coc s’en vet,
Si l’a chacié par le porpris,
Et tant chaça que il l’a pris
Et vint à Renart, si li baille :
Tenez, sire, se Dex me vaille
Page:Le Roman du Renart, 1826, tome 1.djvu/227
Le texte de cette page a été corrigé et est conforme au fac-similé.
