Là où il les vit enanglées,
Toutes troi les a estranglées.
Des deus en fet ses grenons bruire,
La tierce vodra porter cuire.
Qant ot mengié, si fu aaise,
De la granche ist par une haise
Et la tierce geline en porte ;
Mès si con il vint à la porte
Si ot moult grant talent de boire,
Cil qui bien sot la gent deçoivre
Se porpensa que il feroit
Et conment à boivre averoit.
Un puis avoit enmi la cort,
Renart le vit, cele part cort
Por sa soif que il volt estaindre,
Mès il ne pot à l’eve ataindre.
Or a Renart cel puis trové,
Moult par le vit parfont et lé :
Dedenz ne volt-il pas saillir,
Péor ot de soi maubaillir,
Ne il ne put engin savoir
Conment il puist de l’eve avoir.
Seignors, or escoutez merveilles :
En cel puis si avoit deus seilles ;
Qant l’une vient et l’autre vet,
Et Renart qui tant a mal fet,
Desus le puis s’est acoutez
Grains et marriz et trespensez.
Page:Le Roman du Renart, 1826, tome 1.djvu/274
Le texte de cette page a été corrigé et est conforme au fac-similé.
![](http://upload.wikimedia.org/wikipedia/commons/thumb/e/ed/Le_Roman_du_Renart%2C_1826%2C_tome_1.djvu/page274-1024px-Le_Roman_du_Renart%2C_1826%2C_tome_1.djvu.jpg)