Qant vint au jor, levé se sont,
Et par le bois andui s’en vont ;
Il li ensaigne bien la voie
Jusqu’à l’estre parmi l’arbroie ;
Et qant ele i est parvenue,
Por le vilain l’ont connéue
Li dui baron qui l’atendoient
Desouz le fou o il estoient.
Il li ont dit, sire Vilain,
Dame Dieu vos doint hui bon main !
Premier parla Patous li Ors,
Seignors, fet-il, jà est granz jors :
Faites tost, foi que me devez,
Seignors, fet-il, vos cus mostrez.
Sire, dist-il, moult volentiers,
Or me dites conment premiers.
Son cors estent où par devant,
Puis par deriere en estupant,
Lieve sa qeue, le cul bée :
Jusque laiens parmi l’entrée
Li puet-on véoir es boiax,
Tant par est larges li tuiax.
Sire Ysengrin, ce dist Patous,
Moult est voz cus grant et estous :
Vilain, dist-il, or estupez,
Le vostre cul remosterrez.
Cele a ses braies avalées
Qu’ele avoit à son cul fermées,
Page:Le Roman du Renart, 1826, tome 1.djvu/294
Le texte de cette page a été corrigé et est conforme au fac-similé.
