Dant Ysengrin est Conoistables,
Et bien de la Cort est créables ;
Mès se il fust uns bareteres,
Ou faus, ou traïtres ou lerres,
Sa fame ne li poïst mie
Porter tesmoing ne garantie ;
Mès Ysengrin est de tel non
Que s’il n’i avoit se li non,
Si l’en poïst-on très bien croire.
Par foi, sire, dist Baucent, voire ;
Mès autre chose i a encore,
En vostre foi car dites ore
Qui est li pires ne li mieudre,
Chascun se velt as bons acueudre,
Se vos dites que Ysengrins
Est li mieudres de ses voisins,
Renart li vodra contredire
Que il n’est mains loiax ne pire,
Chascun si se tient à preudome.
Por ce vos di à la parsome
Ce ne puet estre que vos dites,
Dont ne seriez-vos pas quites,
Chascun porroit tel clamor fere
Por sa fame à garant atrere,
Et dire cent sols me devez,
Dont maint home seroit grevez.
Ce n’ert pas fait là où je soie,
Issuz estes hors de la voie :
Page:Le Roman du Renart, 1826, tome 1.djvu/347
Le texte de cette page a été corrigé et est conforme au fac-similé.
