Le texte de cette page a été corrigé et est conforme au fac-similé.
C’est si conme Renart fu Tainturier.
Li Rois a fet son ban crier,
Par tot plevir et afier
Que qui porra Renart tenir,
Que ne le face à Cort venir,
Ne Roi ne conte n’i atende,
Mès erroment le prengne et pende.
De ce fu moult pou à Renart,
Fuiant s’en va en un essart ;
Son petit pas s’en vet avant
Et environ lui regardant :
N’est merveilles s’il se regarde,
Que de totes bestes a garde.
En son un grant tertre s’areste,
Vers Orient torne sa teste ;
Lors dist Renart une proiere
Qui moult est precieuse et fiere :
Ha ! Diex qui maint en Trinité,
Qui de tans perilz m’as geté
Et m’as soufert tans malz à fere
Que je ne déusse pas fere,
Garde mon cors d’ui en avant
Par le tien precieus conmant,
Et si m’atorne en itel guise
Et en maniere me devise
