Renart tenoit le chief enclin,
Par foi, fet-il, Dant Ysengrin,
Malvès lechieres, fox desvez,
Conment fot-il à non pelez ?
Dites nos conment il a non,
Fot-il donques pelez Asnon ?
Ysengrin rist qant il ce ot,
Et por le non d’Asnon s’esjot,
Moult l’amast mels que nul avoir.
Volez, fet-il, son non savoir ?
Oïl : conment fu-il pelez ?
Renart a non li desfaez :
Toz nos deçoit, toz nos engigne,
Dex doinst que as poinz je le tiegne.
De lui seroit la terre quite,
Sa part en seroit moult petite.
Toz fot-il malement tornez
Se tu le roz aver trovez :
Foi que devez le Seint martir
Et Seint Tomas de Chantarbir,
Ne por tot l’or que Dex aver
Ne fot voloir moi lui sambler.
Vos avez droit, dist Ysengrin,
Ne vos gariroit Apollin,
Ne toz li ors qui soit en terre,
Que jamès nos méussiez gerre.
Mès or me di, biax dous amis,
Del mestier dont t’es entremis
Page:Le Roman du Renart, 1826, tome 2.djvu/109
Le texte de cette page a été corrigé et est conforme au fac-similé.
