Le texte de cette page a été corrigé et est conforme au fac-similé.
ROMAN
du Renart.
Si coume Renart conchia Brun li Ours du miel.
Perroz qui son engin et s’art
Mist en vers fere de Renart
Et d’Ysengrin son chier conpere,
Lessa le miez de sa matere :
Quant il entr’oblia les plez
Et le jugement qui fu fez
En la Cort Noble le Lion
De la grant fornication
Que Renart fist qui toz max cove,
Envers Dame Hersent la Love.
Ce dist l’estoire es premiers vers
Que jà estoit passez yvers
Et l’aube-espine florisoit,
Et que la rose espanisoit
Et près fu de l’Acension,
Que sire Noble le Lyon
Toutes les bestes fist venir
En son palès por Cort tenir.
