Cil se frandoille et se detorne,
Et Renart qui point ne séjorne
Et qui l’ot mené conme fol,
Le lessa pendre par le col.
Renart li ros, que maufeu larde !
Li dist que des vignes fust garde.
Bien fu li mastins decéuz,
Des gardes fu aparcéuz ;
O maçues et o tiniaus
Li ont bien auné ses buriaus ;
Iloc ont tant le las batu
Q’à la terre l’ont abatu :
Ne bret, ne crie, qu’il ne puet,
Simplement contenir l’estuet,
A grant paine en escapa vis,
Si con il dit, jel’ vos plevis.
Moult devroit-l’en Renart destruire,
Toz li mondes li devroit nuire
Qui si baillist la bone gent.
Jà n’en prendrai or ne argent
Que ne le destruie o nel’ pende,
Se il n’est tiex qu’il se deffende :
Honte m’a fet et vilenie,
Trop ai sofert sa renardie.
Qant il fu au concile oen
Devant la feste Saint Jehen,
De Brun l’Ors, de Tybert le Chat
Et de moi qui par son barat
Page:Le Roman du Renart, 1826, tome 2.djvu/176
Le texte de cette page a été corrigé et est conforme au fac-similé.
