Or ert la novele espandue
Que Hersent aviez croissue,
Ele en velt ci fere joïse
C’onques par li ne fu requise.
Hersent l’oï, mais ne dist rien,
De respondre se garda bien,
Ainçois se taist, si ne dist plus.
Vos savez bien tuit corre sus
Celui qui ne se puet rescorre,
Tuit li autre li corent seure.
Grimbert li Taissons se leva,
Se il puet Renart aidera,
Que ses cousins germains estoit :
Devant le Roi venuz est droit,
Son chapel oste, si s’escout,
Seignor, fait-il, taissiez-vos tout.
Ha ! gentil sire debonere,
Car metez pès en cest afere,
Et s’aiez de Renart merci,
Lessiez le moi amener ci,
Et çà venir à sauveté
De qanqu’Isengrin l’a reté :
Tele amendise li fera
Con vostre Cort esgardera ;
Et se il l’a fait en despit,
Le hardement et le despit
Que il n’est pas venu à Cort
Amendera ains qu’il s’en tort.
Page:Le Roman du Renart, 1826, tome 2.djvu/21
Le texte de cette page a été corrigé et est conforme au fac-similé.
