Au vilain solement sa guimple
Qui trové l’avoit fol et simple,
Ne li osoit dire ne fere
Chose qui li déust desplere,
Et desus le vilain ert dame,
Por ce que ele ert gentilz feme,
Respondu li a en riant,
Certes tot à mon escient
Vos donrai-je conseil, biau sire,
De ce que vos ai oï dire.
Enquenuit devant l’ajornée
Soit une charete atornée,
Et entre moi et Costencete
Si le metron en la charete,
Et nostre garçon Tribolez
Iert avec nos se vos volez :
Car espoir trop nos greveroit
Por ce que trop pesant seroit.
Issi porron-nos esploitier,
Nus ne nos venra agaitier
A cele eure que nus nel’ set,
Ne nus, Diex merci, ne nos het.
Qant ele ot ce dit, si le bese ;
Or estoit li Vilains aése
De ce que sa feme dit ot,
Et du conseil de li s’esgot :
Bien set ne porroit faire miex,
La boche li baise et les iex ;
Page:Le Roman du Renart, 1826, tome 2.djvu/260
Le texte de cette page a été corrigé et est conforme au fac-similé.
